شعر طنز اثر استاد نقوی

ایستدیم منده وئرم بیر سرو سامان جیبیمه طرح و برنامه ایلن رونق شایان جیبیمه

سالدیرام بیر نئچه شهرک نئچه تازه اتوبان قالا انگشت بلب تبریزو تهران جیبیمه

عوض اولدی نظریم ایستدیم استان ایلیم گوردوم استاندا یاراشمور دوزی الان جیبیمه

مملکتدی اوقدر مفته درامدلری وار بانک لار صفده قالوب دست بدامان جیبیمه

بیلمورم هئچ بو درامدلریلن من نه ائدیم هئچ درامد ده یتیشمز عربستان جیبیمه

اللری آغریماسین هیئتی یولداشلاریمین تراور تک باسار هی استادی یان یان جیبیمه

دولی دی جیبلریم استادیله کال آلچاکیمین گورن آغزی سولانور هی باخار حیران جیبیمه

ائله استاد دیولر آزقالورام باور ائدم قورخورام غبطه ائده دعبل و حسّان جیبمه

یادینا سالمازیدی بیر نفر عمرینده منی قوناق ایستور گله خاقانی و قطران جیبمه

سعدی گلمیشدی دونن حافظیلن وام آلا لار گوزلری دوشمیشیدی بو پارا شان شان جیبیمه

بوینی چینینده گورنده اولاری حسرتیلن ایاقیم یردن اوزولدی دئدیم هی جان جیبیمه

نئجه سالدیم اولاری وعده وعیدیله یولا الیمی سالدیم امیدیله پریشان جیبیمه

یل اسور ینگه لر اوینور نه قویوب نه گزیسن ائله بیل نوح سالوب غیظیله طوفان جیبیمه

ائله استاد دی چخورباشی آچوق باشماقی یوخ آج سوز گوزلری یاشلی دولوب عریان جیبیمه

بعضی قفقازی اوخور بعضی ایلات اوخشاماسی طویدی یا اینکه دوشوب شام غریبان جیبیمه

منده قوشدوم سسیمی بختی یاتانلار سسینه دیه سن وردیلار اوت بیردن هراسان جیبیمه

دیدی گیتمه نقوی هیئته داشلار باشوا قیچی گوتدوم ائلدیم حمله اونالان جیبیمه

ولی بیر سوز دئدی سست اولدی ائله ال ایاقیم منی تر باسدی باخا بیلمدیم اوننان جیبیمه

دیدی یادوندادی گلمیشدی بورا بازرگان؟ سنی جاقویدیلا باخدوم ئورگی قان جیبیمه؟

بیرنفر اولمادی اوندا دوتا حتی آدووی نه دییدیم دیون آی خلق مسلمان جیبیمه

یا منی قانع ائدون یا قوون هیئتلردن یا دیون من نه دیوم بو ایوی ویران جیبیمه

دوزدی تبعیض ائلیوبدی منیده چوخ نگران جوابیم دئمگه من قالمشام حیران جیبیمه

باشوزا چالمورام امّا سالورام من یادوزا هئچ ائدوبسوز الوزی بیر دفعه مهمان جیبیمه؟

ایندی هر یرده پاکت صحبتی دی فرق ائلمز حقّیمی قوی دیور اوّل سنه قربان جیبیمه!

دولوسون اوزگیه وئردون بی بوشوندا منه وئر قویما لبخند ورا میرزه قشم خان جیبیمه

پولی اوزگه آپارار من قالورام چاله چالا یازمیوب یازی یازان بیر شایی اوننان جیبیمه

نه پاکت ایستیورم نه بالوزی نه بلاوزی فقط آللهه گوره ایلیون احسان جیبیمه

سیزی تاری منه بوننان صورا استاد دئمیون توکمیون نُقل کیمی استادی هر آن جیبیمه

نئچه ایللردی بوهیئتده سوروننم سیزیلن حاجتیم یوخ بیرینه ایتمیشم اعلان جیبیمه

من حسین(ع)نوکری ام آیری آدی ایستمورم قویموشام بوآدی اوّلده کماکان جیبیمه

بو آدا فخر ایدوب عباس آقا بیر عمر بویی بو آدی هدیه ایدوب اول مه تابان جیبیمه

روستاي شاوون سفلي شهرستان گرمی...